Орталық Азиядағы шетелдік инвестициялардың 68%-ы Қазақстанға тиесілі
Дерек көзі: Freepik
- 2024 жылы Қазақстан экономикасындағы жинақталған тікелей шетелдік инвестициялар көлемі 151,3 млрд долларды құрады, деп хабарлайды NAIZA NEWS Kazinform агенттігіне сілтеме жасап.
-
- Бұл деректер БҰҰ-ның Сауда және даму жөніндегі конференциясының (UNCTAD) «Әлемдік инвестициялар туралы» баяндамасында келтірілген. Аталған көрсеткіш ел экономикасында жұмыс істеп жатқан шетелдік капиталдың ауқымын көрсетеді — өндірістік жобалар мен инфрақұрылымнан бастап, шетелдік инвесторлардың қатысуымен енгізілген технологиялар мен жабдықтарға дейін.
-
- Халықаралық сарапшылардың мәліметінше, Қазақстандағы шетелдік инвестициялар көлемі елдің жалпы ішкі өнімінің шамамен 51,9%-ын құрайды. 2024 жылы республиканың ЖІӨ-і 291,5 млрд долларға жетті, бұл экономиканың дамуына сыртқы капиталдың елеулі үлес қосып отырғанын көрсетеді.
-
- Қазақстан сондай-ақ Орталық Азиядағы негізгі инвестициялық орталық болып қала береді. UNCTAD бағалауы бойынша, өңірдегі барлық жинақталған тікелей шетелдік инвестициялардың шамамен 68,6%-ы дәл Қазақстан экономикасына тиесілі.
-
- Салыстыру үшін, өңірдегі көршілес төрт ел — Өзбекстан, Түрікменстан, Қырғызстан және Тәжікстандағы шетелдік инвестициялардың жалпы көлемі шамамен 69,3 млрд долларды құрайды. Бұл Қазақстан көрсеткішінен екі еседен астам төмен.
-
- Инвестициялар динамикасы соңғы онжылдықтарда тұрақты өсім көрсетіп келеді. Егер 2000 жылы жинақталған тікелей шетелдік инвестициялар көлемі 10,1 млрд доллар болса, 2010 жылы ол 63,4 млрд долларға жетті. Ал 2024 жылы бұл көрсеткіш 151 млрд доллардан асты.
-
- Сарапшылардың пікірінше, экономиканың ауқымы, ішкі нарықтың сыйымдылығы және салыстырмалы түрде тұрақты институционалдық орта Қазақстанды өңірдегі халықаралық капитал тартудың негізгі орталықтарының бірі ретінде сақтап отыр.