Дерек көзі: ҚР ТЖМ Ауа райының күрт нашарлауына — боран, көктайғақ, қатты жел және көрінудің нөлге дейін төмендеуіне байланысты соңғы тәулікте Қазақстан Төтенше жағдайлар министрлігінің қызметкерлері 760 адамды құтқарып, эвакуациялады. Олардың ішінде 36 бала бар. Сондай-ақ қар құрсауында қалған 50 автокөлік шығарылды.
Құтқарылғандардың ең көп саны Қарағанды облысында тіркелді. Мұнда қар құрсауында қалған 407 адам эвакуацияланды. Адамдар жылыту пункттеріне, медициналық мекемелерге және елді мекендерге жеткізілді. Эвакуацияланғандардың ешқайсысына медициналық көмек қажет болған жоқ.
Павлодар облысында құтқарушылар боран мен қатты жел салдарынан жолда қиын жағдайға тап болған 107 азаматқа көмектесті. Автокөліктер қар үйінділері мен жол жиегінен шығарылып, адамдар қауіпсіз орындарға және жылыту пункттеріне жеткізілді.
Ақмола облысында және Астана маңында да құтқарушылар қолайсыз ауа райына байланысты бірнеше жол-көлік оқиғасы мен көлік кептелістері болған трассалардан адамдарды эвакуациялады. Адамдар жоғары өтімді техникамен елді мекендерге және жылыту пункттеріне жеткізілді.
Сонымен қатар Ақтөбе облысында боран салдарынан автожолдың бір бөлігінде қозғалыс шектелді. Екі қалааралық автобустың жолаушылары Шұбарқұдық кентіндегі жылыту пунктіне жеткізілді.
Қазақстан ТЖМ азаматтарды дауылды ескертулерді мұқият бақылауға және қолайсыз ауа райы кезінде алыс сапарлардан бас тартуға шақырады.