Жамбыл облысында 623 мың гектардан астам ауыл шаруашылығы дақылдары егіледі
Дерек көзі: Freepik
- 2026 жылы Жамбыл облысында ауыл шаруашылығы дақылдары 623,3 мың гектар жерге орналастырылады. Өткен жылмен салыстырғанда егіс алқабы 16,7 мың гектарға қысқарады. Облыстық ауыл шаруашылығы басқармасының басшысы Әбдірәсіл Желеубаевтың айтуынша, бұл өзгеріс 2026–2028 жылдары Ислам даму банкінің қолдауымен 76 суару каналына жүргізілетін жөндеу жұмыстарына байланысты.
-
- Суармалы жерлердің уақытша қысқаруына байланысты ылғалды көп қажет ететін көкөніс және бақша дақылдарының көлемі азаяды. Оның орнына өңдеу кәсіпорындарына қажетті шикізат өсіруге басымдық беріледі. Мәселен, дәндік жүгері егістігі 30 мың гектарға дейін, ал қант қызылшасы 8,5 мың гектарға дейін ұлғайтылады.
-
- Өңір диқандары көктемгі дала жұмыстарына қажетті ресурстармен қамтамасыз етілген: 58 мың тонна тұқым дайындалған, 109,7 мың тонна минералды тыңайтқыш енгізу жоспарланған. Сондай-ақ шаруаларға 27,4 мың тонна дизель отыны бөлініп, шамамен 10,7 мың бірлік техника жұмылдырылады.
-
- Өңірде өңдеу өнеркәсібін дамыту жалғасуда. 2026 жылы құны шамамен 800 млрд теңге болатын Fufeng Group компаниясының жүгеріні терең өңдейтін ірі кешенін іске қосу жоспарланған. Толық қуатқа шыққаннан кейін кәсіпорын жылына 3 млн тоннаға дейін жүгері өңдей алады.
-
- Сонымен қатар қант саласы да дамып келеді. Биыл жаңғыртудан кейін Тараз қант зауыты қант қызылшасын қайта өңдеуді бастайды, ал Меркі қант зауыты қалыпты режимде жұмысын жалғастырады. Бұдан бөлек, 2027 жылы өңірде Zhongkai Kazakhstan компаниясының жылына 1 млн тоннаға дейін қант қызылшасын өңдейтін жаңа қант зауытын іске қосу жоспарланған.