Перизат Қайраттың жоғары білім жоқ - сот оның өмірбаянын жоққа шығарды
Дерек көзі: Коллаж: Ulysmedia
- Перизат Қайратқа қатысты өтіп жатқан сот процесі барысында бұған дейін бірнеше жоғары білімі барын айтқан айыпталушының шын мәнінде бірде-бір дипломы жоқ екені белгілі болды.
Сотта айтылған мәліметтерге сәйкес, Қайрат өзін табысты кәсіпкер ретінде көрсету үшін БАӘ-де тұрғаны және отбасылық ет бизнесімен айналысқаны жөнінде жалған ақпарат таратқан. Айыптаушы тарап бұл деректерді алдын ала ойластырылған өмірбаянның бір бөлігі деп бағалады.
Сондай-ақ, 2012 жылы Перизат Қайраттың қылмыстық жауапкершілікке тартылғаны анықталды. Ол кезде қайырымдылық қорын тіркеу барысында құрылтайшылардың қолын қолдан жасап, жалған мекенжай көрсеткен. Көрсетілген кеңсе ғимараты шын мәнінде ойын клубы болып шыққан. Бұл іс кейін тараптардың татуласуымен жабылған.
Аталған деректер қайырымдылық атымен жиналған миллиардтаған теңгені жымқыру ісі бойынша қаралып жатқан сот талқылауының бір бөлігіне айналды.