Атырау облысында сыйымдылығы 15,5 мың тонна болатын көкөніс қоймасы іске қосылды
Дерек көзі: Қазақстан Республикасы Ауыл шаруашылығы министрлігі
- Атырау облысында қуаттылығы 15,5 мың тонна болатын көкөніс қоймасы бар «ITC WEST» заманауи логистикалық орталығы пайдалануға берілді. Бұл — Батыс Қазақстандағы ауқымы мен технологиялық деңгейі бойынша алғашқы нысан. Жоба агрологиялық инфрақұрылымды дамытуға және негізгі азық-түлік өнімдерінің бағасын тұрақтандыруға бағытталған.
-
- Кешеннің жалпы аумағы 30 гектарды құрайды. Логистикалық орталық қолайлы көлік торабында орналасқан және құрамында бес теміржол тұйығы, контейнер алаңы, 5 400 шаршы метрлік «А» санатындағы қоймалар, өндірістік кешендер мен көкөніс қоймасы бар.
-
- Көкөніс қоймасының аумағы — 8 200 шаршы метр. Нысанда температурасы –25 °C-тан +25 °C-қа дейін реттелетін 28 сақтау камерасы жұмыс істейді. Кешен автоматтандырылған температура мен ылғалдылықты бақылау жүйелерімен, заманауи тоңазытқыш жабдықтармен, желдету және микроклиматты басқару жүйелерімен жабдықталған. Бұл үздіксіз әрі энергия үнемдейтін жұмысты қамтамасыз етеді.
-
- Логистикалық орталық басшысы Бауыржан Жолмұхановтың айтуынша, кешеннің басты ерекшеліктерінің бірі — банандарды пісіріп-жетілдіруге арналған арнайы камера. Сұранысқа қарай өнімді кезең-кезеңімен пісіріп, нарыққа жедел жеткізуге мүмкіндік бар.