Источник: magnific.com Қазақстанда психикалық денсаулық саласындағы медициналық көмек көрсету жүйесін кеңейту жоспарланып отыр. Еліміздің 12 өңірінде қосымша 81 бастапқы орталық ашу қажеттілігі анықталған. Сонымен қатар аутизм спектрінің бұзылыстары бар балаларға арналған 189 күндізгі болу бөлімшесін құру көзделген, деп хабарлайды NaizaNews.kz ҚР Денсаулық сақтау министрлігіне сілтеме жасап.
Бұл туралы ведомствода өткен кеңесте Медициналық көмекті ұйымдастыру департаментінің директоры Гүлнар Сәрсенбаева мәлімдеді. Ол халықтың психикалық денсаулығын сақтаудың 2027–2031 жылдарға арналған кешенді жоспарының жобасын таныстырды. Құжат 11 бағыт бойынша 60 іс-шараны қамтиды.
Қазіргі уақытта елімізде 20 психикалық денсаулық орталығы, 101 бастапқы орталық және 212 бейінді кабинет жұмыс істейді. Жаңа мекемелердің ашылуы ерте диагностика, емдеу және оңалту қызметтерін, соның ішінде ауыл тұрғындары үшін де қолжетімді етуге бағытталған.
Аутизм спектрінің бұзылыстары бар балаларға ерекше көңіл бөлінбек. Күндізгі болу бөлімшелерін психикалық денсаулық орталықтары мен аудандық ауруханалар жанынан ашу жоспарланған. Соның нәтижесінде балалар тәулік бойы ауруханада жатпай-ақ оңалту қызметтерін ала алады.
Кеңес барысында Ұлттық психикалық денсаулық орталығының басшысы Әлия Рүстемова өңірлердегі 20 орталыққа жүргізілген мониторингтің қорытындыларын таныстырды.
Денсаулық сақтау министрі Ақмарал Әлназарова еліміздің барлық өңірінде мамандандырылған медициналық көмектің қолжетімді болуын қамтамасыз ету қажеттігін атап өтті.
«Бүгінде психикалық денсаулық мәселелері ерекше маңызға ие. Біздің міндетіміз – пациенттің тұрғылықты жеріне қарамастан, еліміздің барлық өңірінде мамандандырылған көмектің қолжетімділігін қамтамасыз ету», – деп атап өтті Денсаулық сақтау министрі Ақмарал Әлназарова.
Жиында кадр тапшылығы мәселесі де қаралды. Министр балалар мен ересектер психиатриясы салаларын мамандармен қамтамасыз ету жұмысын күшейтіп, медицина қызметкерлеріне қосымша әлеуметтік қолдау шараларын қарастыруды тапсырды.
«Кадр тапшылығы әлі де негізгі мәселелердің бірі болып отыр. Мамандар даярлауды кеңейту, оның ішінде жергілікті атқарушы органдардың білім беру гранттары есебінен оқыту көлемін арттыру және медицина қызметкерлерін әлеуметтік қолдаудың қосымша шараларын қарастыру қажет», – деді министр.
Кешенді жоспар жобасында медициналық ұйымдарды жаңғырту, жабдықтарды жаңарту, амбулаториялық көмекті дамыту және дәрі-дәрмекпен қамтамасыз ету жүйесін жетілдіру де қарастырылған.
Бұл шаралар психикалық денсаулық саласында ерте анықтаудан бастап емдеу, оңалту және әлеуметтік қолдауға дейінгі қызметтердің үздіксіз көрсетілуін қамтамасыз етуге бағытталған.