Дерек көзі: Ақорда Қасым-Жомарт Тоқаев Ұлыбританияның Сауда жөніндегі мемлекеттік министрі, лорд Анас Сарварды қабылдады, деп хабарлайды NaizaNews.kz Ақордаға сілтеме жасап. Кездесу Ақордада өтті.
Мемлекет басшысы Қазақстанның Біріккен Корольдікпен екіжақты қарым-қатынасты одан әрі дамытуға айрықша мән беретінін атап өтті.
«Қазақстан мен Ұлыбританияны сындарлы саяси диалог және түрлі деңгейдегі белсенді қарым-қатынас байланыстырады. Сонымен қатар ынтымақтастықты одан әрі кеңейте түсуге әлеуетіміз жеткілікті екеніне сенімдімін», – деді Қасым-Жомарт Тоқаев.
Президенттің айтуынша, Біріккен Корольдік Қазақстанның негізгі сауда және инвестициялық серіктестерінің бірі саналады. 2025 жылы екіжақты сауда-саттық көлемі 83 пайызға артып, 1,6 миллиард доллардан асты. Қазақстанда 500-ден астам британиялық компания жұмыс істейді.
Қасым-Жомарт Тоқаев сауда-экономикалық байланысты дамытуда адами капиталдың маңызына да тоқталып, қазақстандық жастарды дүниетанымын кеңейтіп, шет тілдерін үйренуге шақырды.
«Сауда-экономикалық байланыстарды ілгерілету жаңа жобалар мен инвестицияларды ғана талап етпейді, сонымен бірге халықаралық ортада еңбек етуге қабілетті адамдар да қажет. Дәл осы себепті Қазақстан жастарын әлемді танып-білуге, дүниетанымын кеңейтуге, көп тіл үйренуге, ең әуелі халықаралық қарым-қатынас құралы саналатын ағылшын тілін меңгеруге шақырамын», – деді Қасым-Жомарт Тоқаев.
Кездесу барысында Мемлекет басшысы Ұлыбритания Премьер-министрі Энди Бёрнэмге жылы лебізін жолдап, оны Қазақстанға сапармен келуге шақырды.