Дерек көзі: Magnific.com Қазақстанда психологтардың мемлекеттік реестрін енгізу ұсынылып отыр, деп хабарлайды NaizaNews.kz ҚР Еңбек және халықты әлеуметтік қорғау министрлігіне сілтеме жасап. Тиісті қағидалардың жобасы қоғамдық талқылауға шығарылды.
Құжатқа сәйкес, реестрге сертификаттаудан өткен психологтар енгізіледі. Мұндай база мамандар туралы мәліметтерді бір жерге жинап, оларды тұрақты түрде жаңартып отыру үшін қажет.
Азаматтар мен ұйымдар реестр арқылы психологтың қолданыстағы сертификаты бар-жоғын тексере алады. Бұл маманның кәсіби қызметпен айналысуға қажетті біліктілігі расталғанына көз жеткізуге мүмкіндік береді.
Қағидаларда психологтарды реестрге енгізу және одан шығару тәртібі де көрсетілген. Бұл нормалар ҚР «Психологиялық қызмет туралы» заңы аясында әзірленген.
Құжатта бұған дейін Қазақстанда психологиялық қызмет саласында жеке заңнамалық реттеу де, психологтардың мемлекеттік реестрі де болмағаны атап өтіледі.
Жоба «Ашық НҚА» порталында жарияланды. Қоғамдық талқылау 2026 жылғы 15 қыркүйекке дейін жалғасады.