Дерек көзі: Aqorda Құрылтайдың алғашқы сессиясында Президент Қасым-Жомарт Тоқаев жаңа шақырылым депутаттарының алдында тұрған негізгі міндеттерді атады.
Ең алдымен, Құрылтай түрлі салалардағы нормативтік-құқықтық базаны мұқият зерделеп, оны Конституция қағидаттарына сәйкестендіруі тиіс.
Мемлекет басшысы жасанды интеллект мәселесіне де ерекше тоқталды. Оның мүмкіндіктерін заң шығару қызметінде және сыбайлас жемқорлық тәуекелдерін азайту үшін кеңінен пайдалану ұсынылды. Осы мақсатта E-Parliament жүйесі әзірленіп жатыр.
Алғашқы сессия барысында депутаттар білім беру саласындағы жасанды интеллект, Digital Qazaqstan стратегиясы, «Алтын виза», көші-қон саясаты, кітапхана және кітап шығару ісіне қатысты заң жобаларының топтамасын да қарастыруы тиіс.
Президент басым бағыттардың қатарында мүмкіндігі шектеулі балаларды кешенді қолдау туралы заңды, сондай-ақ Үкіметтің 16 жасқа толмаған балаларға әлеуметтік желілерде тіркелуге тыйым салу жөніндегі бастамасын жеке атап өтті.
Тоқаев депутаттардың жұмысында жеке мүддеден бұрын ел мүддесі тұруы тиіс екенін атап көрсетті.