Источник: Фото: @roza_alqozha видеосынан алынған кадр Түркістан облысында өткен тойдан жарияланған видео діни және әлеуметтік араздықты қоздыру бабы бойынша қылмыстық істің қозғалуына негіз болды, деп хабарлайды NaizaNews.kz.
Видеоны әнші Роза Әлқожа жариялаған. Онда 66 жастағы күйеу жігіттің туысы адамдардың ішімдіктен бас тартқанын айтып, енді музыкадан да бас тартып, тойларда ерлер мен әйелдерді бөлек отырғызу қажет екенін мәлімдейді.
Оның айтуынша, тойларға әншілер шақырылмаса, олар танымалдылығынан айырылады. Сондай-ақ ол әншілерді «шайтанның жаршылары», ал әйелдерді «ұрғашылар» деп атаған.
Бұл мәлімдемелер қоғамда қызу талқыланды. Мемлекеттік кеңесші Ерлан Карин мұндай сөздердің орынсыз екенін айтып, Қазақстанның зайырлы мемлекет екенін еске салды.
Өз ұстанымын Қазақстан мұсылмандары діни басқармасы да білдірді. ҚМДБ ислам дінінде өнер адамдарын кемсітуге және әйелдерді қорлауға жол берілмейтінін мәлімдеді.
Кейін полиция аталған дерек бойынша діни және әлеуметтік араздықты қоздыру бабы бойынша қылмыстық іс қозғалғанын хабарлады. Қазіргі уақытта қажетті тергеу амалдары жүргізіліп жатыр.