Дерек көзі: KTK бейнежазбасынан алынған скриншот 42 жастағы әйел өз пәтерінен өлі күйінде табылды. Оқиғаға байланысты оның 38 жастағы азаматтық некедегі жұбайы ұсталды, деп хабарлайды NaizaNews.kz КТК телеарнасына сілтеме жасап.
Телеарна мәліметінше, қайғылы оқиға көпқабатты тұрғын үйдің бесінші қабатындағы пәтерде болған. Кешке үйге келген 16 жастағы қызы анасын қансырап жатқан күйінде тауып, жанында үш жасар қарындасы болған.
Марқұмның анасының айтуынша, кішкентай қыз алғашында ештеңе айтпаған. Кейін әкесінің анасын пышақтағанын көргенін айтып, болған оқиғаны полиция қызметкерлеріне де жеткізген.
Туыстарының сөзінше, марқұм төрт баланың анасы болған және шағын дүкен иесі болған. Сондай-ақ олардың айтуынша, азаматтық некедегі жұбайы бұған дейін де жанжал шығарып жүрген, ал әйел бірнеше рет полицияға жүгінген.
Атырау облысы полиция департаментінің мәліметінше, тұрмыстық жанжал кезінде әйелді өлтірді деген күдікпен оның 38 жастағы азаматтық некедегі жұбайы ұсталды. Аталған факті бойынша «Адам өлтіру» бабы бойынша қылмыстық іс қозғалды.
Марқұмның туыстары балалардың тәрбиесін өз мойнына алатынын айтты. Олардың сөзінше, ең алдымен қыздарға психологиялық көмек көрсетіледі.