Дерек көзі: «Әділет» партиясы «Әділет» партиясының III кезектен тыс съезінің делегаттары партия Жарғысына енгізілген өзгерістер мен толықтыруларды, сондай-ақ мүшелік жарналардың жаңа мөлшерін бекітті, деп хабарлайды Naizanews.kz.
Партия Саяси кеңесінің өкілдері Бекжан Әлімқұлов пен Гүлзира Атабаеваның айтуынша, Жарғының жаңа редакциясы Қазақстан Республикасының жаңа Конституциясы мен қолданыстағы заңнамадағы өзгерістерді ескере отырып әзірленген.
Жалпы өзгерістер құжаттың 40 ережесіне енгізілді. Олар Жарғыны Конституция талаптарына сәйкестендіруге, партияішілік басқару жүйесін жетілдіруге және партия жұмысының тиімділігін арттыруға бағытталған. Әзірлеушілердің айтуынша, жаңартылған құжат партия қызметін заманауи, икемді әрі қазіргі талаптарға сай етуге мүмкіндік береді.
Сонымен қатар делегаттар мүшелік жарналардың мөлшерін бекітті. Жұмыс істейтін азаматтар үшін ай сайынғы жарна – 0,1 АЕК, студенттер үшін – 0,01 АЕК болып белгіленді. Зейнеткерлер, мүгедектігі бар адамдар, бала күтімі демалысындағы ата-аналар және мүгедектігі бар балалардың заңды өкілдері мүшелік жарна төлеуден босатылады.
Ұйымдастыру мәселелері қаралғаннан кейін съезд қатысушылары партияның сайлауалды бағдарламасын, Құрылтай депутаттығына кандидаттар тізімін және съездің қорытынды қаулысын талқылауға кірісті.