Дерек көзі: ЖИ көмегімен жасалған Қазақстанда мемлекеттік тілдегі кітаптарға қызығушылық артып келеді. Соңғы бір жылда еліміздің көпшілік кітапханалары оқырмандарға 88,9 млн басылым ұсынса, оның 53,4 млн данасы, яғни 60,1%-ы қазақ тіліндегі әдебиеттер болды, деп хабарлайды NaizaNews.kz ҚР Мәдениет және ақпарат министрлігіне сілтеме жасап.
Оқырмандар сұранысының артуы кітапхана қорларының толығуынан да байқалады. Бір жыл ішінде кітапханалар 906,5 мың жаңа басылыммен толықты. Оның 662,3 мың данасы қазақ тіліндегі кітаптар.
Қазіргі таңда көпшілік кітапханалардағы қазақ тіліндегі әдебиеттер қоры 30,3 млн данаға жетіп, жалпы кітапхана қорының 41,7%-ын құрайды.
Оқырмандар арасында ең көп сұранысқа ие бағыт – көркем әдебиет. Сондай-ақ тіл білімі мен әдебиеттану саласындағы кітаптар да жоғары сұранысқа ие. Бұл бағыттағы басылымдардың оқырманға берілген жалпы көлемі 51,3 млн дана, яғни барлық берілген әдебиеттің 57,6%-ын құрады. Бір жыл ішінде кітапханалар осы бағыттағы 577,7 мың жаңа басылыммен толықты.
Көпшілік кітапханаларының негізгі оқырмандарының қатарында балалар мен жастар басым. Олардың ішінде 1,75 млн-ы – 15 жасқа дейінгі балалар, 1,38 млн-ы – жастар. Ересек оқырмандар саны 2,4 млн адамды құрайды.
Кітап оқитын тұрғындардың ең жоғары үлесі Павлодар облысында (47%), Солтүстік Қазақстан облысында (45%) және Батыс Қазақстан облысында (42%) тіркелген.
ҚР Мәдениет және ақпарат министрлігінің мәліметінше, қазақ тіліндегі кітаптарға қызығушылықтың артуы, көркем әдебиетке сұраныстың жоғары болуы және жастардың белсенділігі елімізде кітап оқу мәдениетінің одан әрі дамуына ықпал етіп отыр.