Источник: Aqorda Президент Қасым-Жомарт Тоқаев Парламенттің бірлескен отырысында Қазақстан экономикалық өсудің жаңа моделіне көшіп жатқанын мәлімдеді, деп хабарлайды Naizanews.kz.
Мемлекет басшысының айтуынша, бұрынғы тәсілдер қазіргі сын-қатерлерге сай келмейді. Күрделі халықаралық жағдайға қарамастан, ел экономикасы өсуді жалғастыруда: өткен жылы өсім 6,5%-ды құрады, ал 2019 жылдан бері жан басына шаққандағы ІЖӨ бір жарым есеге артып, 15 мың долларға жетті.
Президент қабылданған Бюджет және Салық кодекстері мемлекеттік қаржыны басқару жүйесін толық жаңғыртқанын айтты. Сонымен қатар жаңа Құрылыс және Су кодекстері қабылданды.
Қасым-Жомарт Тоқаевтың айтуынша, 2025 жылы Қазақстанда рекордтық 20 миллион шаршы метр тұрғын үй пайдалануға берілді. Ал 2026 жылы 12 сумен жабдықтау жобасы аяқталып, соның нәтижесінде 500 мыңнан астам ауыл тұрғыны таза ауызсуға қол жеткізеді.
Президент «Алатау» жобасына ерекше тоқталды. Оның сөзінше, жаңа қаланың арнайы құқықтық режимі инвестиция тартуға, инновациялық кластерлерді дамытуға және Қазақстанды Еуразияның жоғары технологиялық әрі іскерлік хабына айналдыруға мүмкіндік береді.
Сондай-ақ 2026 жылы энергетикалық және коммуналдық инфрақұрылымды жаңғыртуға арналған ауқымды ұлттық жоба басталады. Оны іске асыруға 1 трлн теңгеден астам қаржы бағыттау жоспарланған.