Дерек көзі: Қазақстан Республикасы Көлік министрлігі Қазақстанда 2026–2028 жылдарға арналған автомобиль жолдарын дамыту жоспары аясында республикалық маңызы бар жолдарды жаңғырту жұмыстары қарқынды жүргізілуде, деп хабарлайды NaizaNews.kz ҚР Көлік министрлігіне сілтеме жасап.
Министрлік мәліметінше, биыл республикалық маңызы бар автожолдардың шамамен 8,9 мың шақырымы жол жұмыстарымен қамтылған. Жалпы алғанда, еліміз бойынша барлық деңгейдегі 11 мың шақырымнан астам жолда құрылыс, реконструкциялау және жөндеу жұмыстары жүргізіліп жатыр.
Ірі жобалардың қатарында «Қызылорда – Жезқазған» автожолын қайта жаңғырту бар. Жалпы ұзындығы 400 шақырым болатын жолдың Қызылорда облысындағы 192 шақырымы аяқталып, пайдалануға берілсе, Ұлытау облысындағы учаскеде жұмыстар жалғасуда. Сонымен қатар «Ақтөбе – Ұлғайсын», «Өскемен – Рахман қайнары», Ертіс өзені арқылы өтетін жаңа көпір және Атырау қаласының айналма жолы сияқты маңызды жобалар іске асырылып жатыр.
2026–2027 жылдары жалпы ұзындығы 4 мың шақырым болатын 126 учаскеде орташа және күрделі жөндеу жұмыстарын аяқтау жоспарланған. Оның ішінде 321 шақырым күрделі жөндеумен, ал 3,6 мың шақырымнан астамы орташа жөндеумен қамтылады.
Көлік министрлігінің мәліметінше, 2030 жылға дейін «Орталық – Батыс», «Жезқазған – Қарағанды», «Қызылорда – Ақтөбе» бағыттары мен бірқатар қалалардың айналма жолдарын қамтитын жаңа инфрақұрылымдық жобаларды жүзеге асыру көзделіп отыр.