Дерек көзі: Жасанды интеллект Қазақстан медициналық-санитариялық алғашқы көмекті (МСАК) дамыту бағытындағы жұмысты жалғастырып келеді, деп хабарлайды NaizaNews.kz ҚР Денсаулық сақтау министрлігіне сілтеме жасап.
МСАК жүйесін жетілдіру мәселелері Астанада өткен «Қазақстанның денсаулық сақтау жүйесі: жаңа сын-қатерлер жағдайындағы даму. Отбасылық дәрігер практикасындағы дәлелді медицина» атты халықаралық ғылыми-практикалық конференцияның негізгі тақырыптарының біріне айналды. Іс-шараға Қазақстан мен шетелден 950-ден астам маман қатысты.
Конференция жұмысына Денсаулық сақтау министрі Ақмарал Әлназарова, Дүниежүзілік денсаулық сақтау ұйымының өкілдері, медицина ұйымдарының басшылары, жалпы практика дәрігерлері, мейіргерлер, ғалымдар және халықаралық сарапшылар қатысты.
Министрліктің мәліметінше, бүгінде еліміздегі учаскелердің 80 пайыздан астамына жалпы практика дәрігерлері қызмет көрсетеді. Сонымен қатар отбасылық медицина моделін дамыту, мейіргерлердің дербес қабылдауын кеңейту, цифрлық технологияларды енгізу және аурулардың алдын алу шараларын күшейту жұмыстары жүргізіліп жатыр.
2026 жылдан бастап барлық скринингтік зерттеулер тегін медициналық көмектің кепілдік берілген көлемі аясында жүргізіледі. Биылғы жылдың бірінші тоқсанында артериялық гипертензияны анықтау көрсеткіші 13 пайызға, ал II типті қант диабетін анықтау 26 пайызға артқан.
Жаңа ақпараттық шешімдерді енгізу нәтижесінде алғашқы буын медицина қызметкерлерінің жүктемесі 40 пайызға төмендеп, дәрігерлердің пациенттерге көбірек уақыт бөлуіне мүмкіндік берілді.
Алдағы уақытта жалпы практика дәрігерлерімен қамтуды толық қамтамасыз ету және созылмалы ауруларға байланысты алдын алуға болатын ауруханаға жатқызу жағдайларын азайту жоспарланып отыр.
Конференция барысында халықаралық ынтымақтастық, цифрлық денсаулық сақтау мен телемедицинаны дамыту, аурулардың алдын алу, дәлелді медицина қағидаттарын енгізу және мейіргерлік қызметті жетілдіру мәселелеріне ерекше назар аударылды.
Дүниежүзілік денсаулық сақтау ұйымының Қазақстандағы елдік офисінің басшысы доктор Скендер Сыла Қазақстанның медициналық-санитариялық алғашқы көмекті дамытуға бағытталған бастамаларының маңызын атап өтті.
Сондай-ақ іс-шара аясында отбасылық медицинаны дамыту, халықты дәрілік қамтамасыз ету, денсаулық сақтау жүйесін цифрландыру, кадрлық әлеуетті нығайту және мейіргерлердің кәсіби рөлін арттыруға арналған сарапшылық кездесулер ұйымдастырылды.