Дерек көзі: Қазақстан Республикасы Энергетика министрлігі Қазақстан Республикасы Энергетика вице-министрі Санжар Жаркешов Германия Федеративтік Республикасының Экономика және энергетика федералдық министрлігінің статс-хатшысы Штефан Рунхоффпен кездесті, деп хабарлайды NaizaNews.kz ҚР Энергетика министрлігіне сілтеме жасап.
Кездесу барысында тараптар энергетика саласындағы екіжақты ынтымақтастықтың қазіргі жағдайы мен оны одан әрі дамыту перспективаларын талқылады. Сондай-ақ жаһандық энергетикалық қауіпсіздік, энергия ресурстарын тұрақты жеткізу және халықаралық әріптестікті нығайту мәселелері бойынша пікір алмасты.
Келіссөздерде мұнай саласындағы серіктестікке ерекше назар аударылды. Тараптар Қазақстан мұнайын Германияға жеткізу бойынша қалыптасқан ынтымақтастықты және оны одан әрі дамыту мүмкіндіктерін қарастырды. Энергетикалық әріптестіктің тұрақтылығы мен сенімділігіне басымдық берілетіні атап өтілді.
Көмір өнеркәсібі саласында Германияның Koch Solutions компаниясы қазақстандық кәсіпорындарға технологиялық шешімдер мен заманауи жабдықтар жеткізуге қызығушылық танытып отырғаны айтылды. Қазақстан тарапы бұл бағыттағы ұсыныстарды қарастыруға және көмір өнеркәсібі мен көмір химиясы саласына жаңа технологияларды тартуға дайын екенін жеткізді.
Кездесу барысында «жасыл» сутегі жобаларын дамыту мәселелері де талқыланды. Тараптар бұл бағыттағы ынтымақтастықты жалғастыруға өзара мүдделі екенін білдіріп, жобаларды іске асыру үшін қажетті алғышарттардың бар екенін атап өтті.
Кездесу қорытындысы бойынша Қазақстан мен Германия энергетика саласындағы өзара тиімді әріптестікті одан әрі нығайтуға және конструктивті диалогты жалғастыруға дайын екендерін растады.