Дерек көзі: Қазақстан Республикасы Ғылым және жоғары білім министрлігі Академик Е.А. Бөкетов атындағы Қарағанды ұлттық зерттеу университетінің профессоры Тимур Сериков наноматериалдар мен сутек энергетикасы саласында зерттеулер жүргізуде, деп хабарлайды Naizanews.kz. Оның ғылыми жұмысы экологиялық таза технологияларды дамытуға бағытталған.
Ғалым КарМУ-да білім алып, бакалаврдан PhD дәрежесіне дейінгі жолдан өткен, сондай-ақ М.В. Ломоносов атындағы ММУ-де постдокторантурадан өткен. 2017 жылдан бері ғылыми-педагогикалық қызметпен айналысып, «ЖОО-ның үздік оқытушысы – 2020» атағына ие болған.
Зерттеулерінің негізгі бағыты — фотокатализ және күн энергетикасына арналған наноматериалдарды синтездеу. Бұл қатарда титан диоксиді, графен және перовскиттер негізіндегі әзірлемелер бар.
Сериковтың ғылыми қоржынында 100-ге жуық еңбек, халықаралық журналдардағы жарияланымдар мен патенттер бар. Оның жобалары шетелдік университеттермен бірлесіп жүзеге асырылып, «жасыл» энергетиканы дамытуға бағытталған.
Әзірлемелер сутек көлігі, отын элементтері және экологиялық мониторинг салаларында қолданылуы мүмкін. Сарапшылар мұндай зерттеулер Қазақстанның ғылыми әлеуетін күшейтіп, тұрақты технологияларды дамытуға ықпал ететінін атап өтеді.