Источник: Freepik Қазақстанда өрт қаупі жоғары кезең басталды, деп хабарлайды NAIZA NEWS ҚР Төтенше жағдайлар министрлігіне сілтеме жасап. Ведомство өңірлерде өрттің алдын алу шараларын бастап кетті.
Маусым елдің оңтүстігі мен батысында наурыз айының соңында басталып, сәуірден бастап орталық және солтүстік өңірлерді қамтыды. Шығыс Қазақстан облысында өрт қаупі кезеңі 13 сәуірде басталған.
Құтқарушылар азаматтарды ашық отты қолдану кезінде аса сақ болуға шақырады. Құрғақ әрі желді ауа райында от жағуға және қоқыс өртеуге тыйым салынады. Қолайлы жағдайда бұл тек қауіпсіз арақашықтықта және бақылаумен ғана рұқсат етіледі.
Мангалды ғимараттардан кемінде 10 метр қашықтықта және өрт сөндіру құралдары болған жағдайда ғана қолдануға болады. Сондай-ақ құрғақ шөпті өртеуге және сөндірілмеген темекі тұқылдарын тастауға болмайды.
ТЖМ аумақтарды құрғақ өсімдіктерден тазалап, балалардың отпен ойнауына жол бермеуді ескертеді. Өрт шыққан жағдайда 101 немесе 112 нөмірлеріне дереу хабарласу қажет.