Ғылымдағы әйелдер мен қыздардың халықаралық күні: ҒЖББ министрі әріптестерін мерекемен құттықтады
Источник: Қазақстан Республикасы Ғылым және жоғары білім министрлігі
- Бүгін әлемде Ғылымдағы әйелдер мен қыздардың халықаралық күні атап өтіледі. Қазақстан Республикасының Ғылым және жоғары білім министрі Саясат Нұрбек әріптестерін мерекемен құттықтап, ғылыми ойдың дамуына, инновациялар мен прогреске әйелдердің қосып отырған үлесін атап өтті.
-
- БҰҰ Бас Ассамблеясы бекіткен бұл халықаралық күн ғылымдағы тең мүмкіндіктердің маңызын айқындауға және қыздарды зерттеушілік жолды таңдауға ынталандыруға бағытталған. Министрдің айтуынша, әйелдер елдің ғылыми әлеуетін қалыптастыруда шешуші рөл атқарады. Қазақстанда жоғары оқу орнынан кейінгі білімі бар 120 896 адам бар, олардың 62 433-і, яғни 51,6%-ы — әйелдер.
-
- Әйелдер жоғары білім беру жүйесінде де жетекші орындарды нық иеленіп отыр: профессор-оқытушылар құрамындағы үлесі 65,7%-ды құрайды. Елде ғылыми зерттеулермен айналысатын әйелдер саны 12 893-ке жетіп, бұл ғылыми персоналдың 56%-ына тең. Зерттеушілердің жалпы санындағы әйелдердің үлесі 55,7%-ды құрайды.
-
- Зерттеу салалары бойынша ең көп әйелдер жаратылыстану ғылымдарында еңбек етеді — 3 625 адам (28%). Инженерлік ғылымдар мен технологиялар саласында 2 625 әйел (20%), ал гуманитарлық ғылымдарда 2 471 әйел (19%) жұмыс істейді. Гуманитарлық және әлеуметтік ғылымдарда әйелдердің үлесі тиісінше 66% және 65%-ға жетеді.
-
- Министр әйелдердің ғылыми біліктілігінің жоғары деңгейін де атап өтті: ғылым кандидаттары арасында әйелдердің үлесі 60%, бейіндік докторлар мен магистрлер — 58%, философия докторлары (PhD) — 54%. Медицина және гуманитарлық ғылымдарда ғылым кандидаттары арасындағы әйелдердің үлесі 72%-ды құрайды.
-
- Сөз соңында министр ғылымға өз өмірін арнаған әйелдер мен қыздарға алғыс білдіріп, кәсіби табыс, ғылыми идеяларын жүзеге асыру, зор денсаулық пен бақ-береке тіледі.