Источник: Zakon.kz Қазақстанның Ішкі істер министрлігі көлік құралдарын тіркеу және жүргізуші куәлігін алу емтихандарын тапсыру ережелеріне түзетулер әзірледі. Ұсынылған өзгерістер емтиханды қайта тапсыру тәртібіне, шетелдік жүргізуші куәліктерін айырбастауға және қайта жабдықталған автомобильдерді тіркеуге қатысты, деп хабарлайды NaizaNews.kz ҚР Ішкі істер министрлігіне сілтеме жасап.
Бұл туралы ІІМ Әкімшілік полиция комитеті басқармасы бастығының орынбасары Ақтоты Боранова мәлімдеді. Оның айтуынша, министрлік мемлекеттік қызметтерді алу тәртібін жеңілдетіп, артық рәсімдерді қысқартуды көздеп отыр.
Ұсынылған өзгерістердің бірі жүргізуші болуға үміткерлердің емтиханды қайта тапсыру мерзіміне қатысты. Алғашқы сынақтан өте алмаған азамат келесі жұмыс күні қайта емтихан тапсыра алады.
Екінші сәтсіз әрекеттен кейін қосымша дайындалуға 10 күнтізбелік күн беріледі. Ал теориялық немесе практикалық емтиханнан үш рет өте алмаған үміткер тиісті емтиханды кейінгі жолы ақылы негізде тапсырады.
Министрліктің түсіндіруінше, бұл талап болашақ жүргізушілердің емтиханға тыңғылықты дайындалуына ықпал етуі тиіс.
Сонымен қатар теориялық емтихан нәтижесін сақтау тәртібін өзгерту ұсынылды. Егер үміткер теориялық сынақтан сәтті өтіп, практикалық емтиханнан өте алмаса, теория бойынша алған оң нәтижесі жойылмайды.
Шетелдік жүргізуші куәліктерін айырбастауға қатысты да жаңа талаптар қарастырылған. Қазақстандық жүргізуші куәлігін алу үшін теориялық емтиханнан өту қажет болады. Бұған қоса, шетелдік құжаттың түпнұсқалығын оны берген мемлекеттің құзыретті органы ресми сұрау салу арқылы растауы керек.
Ақтоты Боранованың айтуынша, мұндай тексеру жалған жүргізуші куәліктерінің пайдаланылуына жол бермеуге бағытталған.
Түзетулер көлік құралдарын қайта жабдықтағаннан кейін тіркеу рәсіміне де қатысты. Автомобильдің конструкциясына өзгерістер енгізілген жағдайда оны қосымша тексеруден өткізу талап етілмейді. Ол үшін жасалған өзгерістердің қауіпсіздігін растайтын құжат жеткілікті болады.
ІІМ өкілі азаматтарды жол қозғалысы ережелерін сақтауға шақырды.