Дерек көзі: Ақорда Ақордада Қазақстан Президенті Қасым-Жомарт Тоқаев, Бельгия королі Филипп және патшайым Матильданың қатысуымен кеңейтілген құрамдағы келіссөз өтті, деп хабарлайды NaizaNews.kz Ақорданың баспасөз қызметіне сілтеме жасап.
Мемлекет басшысы Қазақстан мен Орталық Азияға алғаш рет мемлекеттік сапармен келген бельгиялық монархтарға ілтипат білдірді. Ол бұл оқиғаның тарихи маңызын атап өтіп, екі мемлекет арасындағы достық байланыстарға тоқталды.
«Осы тарихи сәтте Сіздермен жүздесіп, мемлекеттеріміз арасындағы берік достықты атап өту – мен үшін зор мәртебе. Аса мәртебелі Король Филипп, халқыңызға қалтқысыз қызметіңізді жоғары бағалаймыз. Cіз Корольдік билігіне келгелі еліңіз өркендеп, әлемдік аренадағы лайықты орнын бекіте түсті. Халқыңызға адалдығыңыз және Бельгияны мекендейтін түрлі қауымдар арасындағы өзара түсіністікті нығайту жолындағы табанды еңбегіңіз Тәждің ел бірлігін сақтаудағы рөлін айқындай түседі. Біз де «Бірлігіміз – әралуандықта» деген қағидатқа айрықша мән береміз. Әрбір азаматтың келешегімізге атсалысқанын қалаймыз. Көп жылдан бері кәсіпкерлікті, білім мен инновацияны дамытуға ерекше күш салып келесіз. Бұл – шын мәнінде үлгі тұтарлық ізгі істер. Король әулетінің Бельгия бизнесіне ұдайы қолдау көрсетуі шексіз құрметке лайық. Аса мәртебелі Патшайым Матильда, Сіз бұл сапардың мән-мазмұнын арттырып, шырайын келтірдіңіз. Сіздің балаларды қорғау, білім беру, адамның қадір-қасиетін құрметтеу мәселелеріне келгенде, ерекше жанашырлығыңыз бен қамқорлығыңызға тәнтіміз. Бұл игі мұраттар азаматтарымызды шын мәнінде сүйсінтеді», – деді Мемлекет басшысы.
Келіссөз барысында Президент көлік және логистика, аса маңызды минералдар, жаңартылатын энергетика, ауыл шаруашылығы, денсаулық сақтау және жасанды интеллект салаларында өзара іс-қимылды кеңейту мүмкіндіктеріне назар аударды.
Король Филипп жылы қабылдағаны үшін Қасым-Жомарт Тоқаевқа алғыс айтып, тақ мұрагері кезінде Қазақстанға жасаған бұрынғы сапарларын еске алды.
Кездесуде ресми делегация өкілдері де сөз сөйледі. Келіссөз қорытындысында тараптар практикалық ынтымақтастықты одан әрі дамытуға дайын екенін растады.