Источник: Қазақстан Республикасы Ұлттық экономика министрлігі Қазақстанда «Іскер аймақ» бағдарламасы бойынша шағын бизнесті мемлекеттік қолдау қағидалары өзгерді, деп хабарлайды NaizaNews.kz ҚР Ұлттық экономика министрлігіне сілтеме жасап. Жаңа шарттар Үкіметтің 2026 жылғы 18 тамыздағы қаулысымен бекітілді.
Негізгі өзгерістердің бірі әлеуметтік кәсіпкерлерге қатысты. Енді әлеуметтік кәсіпкерлердің жобалары бағдарламаға салалар бойынша шектеусіз қатыса алады. Бұл ретте кәсіпкердің қызмет түрі әлеуметтік кәсіпкерлік субъектілерінің реестрінде көрсетілуі керек.
Әлеуметтік бизнес үшін қолдау мөлшері де ұлғайтылды. Жаңартылған қағидалар бойынша олар үшін субсидиялау номиналды сыйақы мөлшерлемесінің 50%-ын құрайды. Ал басқа кәсіпкерлер үшін бұл көрсеткіш 40% деңгейінде қалады.
Өтінім беру тәртібі де өзгерді. Кәсіпкерлер қаржыландыру алу үшін «Даму» қорымен жұмыс істейтін кез келген екінші деңгейлі банкке немесе лизингтік компанияға жүгіне алады. Қаржыландыру мақұлданғаннан кейін жоба Қорға жолданады. Онда субсидия беру туралы шешім бес жұмыс күні ішінде қабылданады.
Бағдарламада инвестициялық жобаларға қатысты шарттар да нақтыланды. Жабдық, техника, көлік, құрылыс материалдары және басқа да активтер сатып алынған кезде кәсіпкерлер алдымен тиісті реестрге енгізілген қазақстандық өндірушілердің өнімін таңдауы керек. Егер қажетті тауар реестрде болмаса, оны басқа өндірушілерден сатып алуға рұқсат етіледі.
Инвестициялық жобаларды іске асыру мерзімі енді субсидиялау басталған күннен бастап 18 айды құрайды. Бұған дейін бұл мерзім 24 ай болған. Белгілі бір жағдайларда мерзімді ұзартуға болады, бірақ ол алты айдан аспауы тиіс.
Сонымен қатар кәсіпкерлер «Даму» қорының субсидия беруден бас тарту туралы шешіміне әкімшілік немесе сот тәртібімен шағымдана алады.
Бағдарламаға микро және шағын кәсіпкерлік субъектілері, ауыл шаруашылығы кооперативтері және әлеуметтік кәсіпкерлік субъектілері қатыса алады. Кредиттің ең жоғары сомасы 200 млн теңгеге дейін, ал субсидиялау мерзімі үш жылға дейін белгіленген.