Дерек көзі: ҚР Су ресурстары және ирригация министрлігі Қазақстан мен Алжир су ресурстары саласындағы ынтымақтастықты нығайтуға бағытталған екі жылдық жол картасын әзірлеуді жоспарлап отыр, деп хабарлайды NaizaNews.kz ҚР Су ресурстары және ирригация министрлігіне сілтеме жасап.
Бұл мәселе Су ресурстары және ирригация министрі Нұржан Нұржігітовтің Қазақстандағы Алжир Халық Демократиялық Республикасының Төтенше және өкілетті елшісі Осман Михаджимен кездесуі барысында талқыланды.
Кездесуде тараптар су ресурстарын басқаруды цифрландыру, бірлескен ғылыми зерттеулер жүргізу, өнеркәсіптік су пайдалану, суды тұщыту және жерасты су қорларын игеру бағытындағы ынтымақтастық мүмкіндіктерін қарастырды. Алжир тарапы Қазақстанның су ресурстарын цифрлық басқару тәжірибесіне қызығушылық білдірді.
Кездесу қорытындысы бойынша екі жылға арналған жол картасын әзірлеу үшін бірлескен жұмыс тобын құру туралы келісімге қол жеткізілді. Сондай-ақ екі елдің ғылыми ұйымдары арасында пилоттық жобаларды іске асыру және сала мамандарының тәжірибе алмасу мүмкіндігі талқыланды.
Министр Нұржан Нұржігітовтің айтуынша, Қазақстан үшін Алжирдің өнеркәсіпте, ауыл шаруашылығында және тұрғын үй-коммуналдық секторда суды үнемдеу мен тиімді пайдалану тәжірибесі маңызды. Сонымен қатар тараптар су шаруашылығы саласындағы мамандар алмасу мүмкіндігін де қарастырып жатыр.