Дерек көзі: Қазақстан Республикасы Ауыл шаруашылығы министрлігі Қазақстан Республикасы Ауыл шаруашылығы министрінің орынбасары Азат Сұлтанов Құс өсірушілердің XIII халықаралық форумы аясында Ресей Федерациясы Ауыл шаруашылығы министрінің кеңесшісі Ольга Абрамовамен кездесті, деп хабарлайды NaizaNews.kz ҚР Ауыл шаруашылығы министрлігіне сілтеме жасап.
Кездесу барысында тараптар Еуразиялық экономикалық одақ аясындағы ғылыми-өндірістік ынтымақтастықты дамыту, импортты алмастыру, асыл тұқымды мал базасын нығайту және бірлескен жобаларды жүзеге асыру мәселелерін қарастырды.
Селекциялық-генетикалық тәуелсіздікке ерекше назар аударылды. Ресей тарапы Қазақстанға Қытаймен бірлесіп құрылған халықаралық ғылыми-коммуникациялық платформаға қосылуды ұсынып, ғылыми байланыстарды кеңейтуге қызығушылық білдірді.
Сонымен қатар құс шаруашылығы саласындағы бірлескен ғылыми жобаларды дамыту, инкубациялық жұмыртқа мен асыл тұқымды материалдарды жеткізу тізбегін нығайту, эмбрион орталықтарын құру және қазақтың ақбас сиыры тұқымын дамыту бағыттары талқыланды.
Кездесуде мал шаруашылығын цифрландыру мәселелері де сөз болды. Атап айтқанда, жасанды интеллект негізінде жануарлардағы ақсақтықты ерте анықтауға мүмкіндік беретін табынның ортопедиялық саулығын бақылаудың бірыңғай жүйесін енгізу ұсынылды. Бұл шешім жоғары өнімді мал басының шығынын азайтып, сүтті мал шаруашылығының тиімділігін арттыруға мүмкіндік береді.
Сондай-ақ тараптар тірі мал мен ет өнімдерін жеткізу, логистиканы жетілдіру және отандық ауыл шаруашылығы тауарын өндірушілерді сапалы асыл тұқымды малмен қамтамасыз ету мәселелерін талқылады.
Кездесу қорытындысында ҚР Ауыл шаруашылығы министрлігінің бейінді департаменттері мен Ұлттық аграрлық ғылыми-білім беру орталығының ұйымдарына ұсынылған бастамаларды жан-жақты пысықтау тапсырылды.