Дерек көзі: Қазақстан Республикасы Ауыл шаруашылығы министрлігі А.И. Бараев атындағы Астық шаруашылығы ғылыми-өндірістік орталығында органикалық өнім өндіретін жаңа цехты іске қосуға дайындық жұмыстары аяқталуға жақын, деп хабарлайды NaizaNews.kz ҚР Ауыл шаруашылығы министрлігіне сілтеме жасап.
Министрліктің мәліметінше, жаңа өндірісте өсімдіктерді қорғаудың химиялық құралдарын, пестицидтер мен өзге де агрохимикаттарды қолданбай өсірілген дәнді дақылдар негізінде органикалық өнімдер шығарылатын болады. Жоба экологиялық таза өнім көлемін арттыруға және ауыл шаруашылығы шикізатының қосылған құнын көбейтуге бағытталған.
Өндірістің шикізаттық базасын Орталықтың тәжірибелік алқаптары қамтамасыз етеді. Мұнда органикалық егіншілік қағидаттарына сәйкес дәнді, майлы және бұршақ тұқымдас дақылдар өсіріледі. Сонымен қатар Орталық ғалымдарының ауыл шаруашылығы дақылдарын өсіру технологияларын жетілдіруге арналған ғылыми әзірлемелері өндіріске енгізіледі.
Жоба аясында цифрлық шешімдер мен өндірістік процестерді автоматтандыруға ерекше назар аударылған. Заманауи технологиялар егіс алқаптарының жағдайын нақты уақыт режимінде бақылауға, топырақ көрсеткіштері мен ауа райы жағдайларын талдауға және өндірістің тиімділігін арттыруға мүмкіндік береді.
Ауыл шаруашылығы министрлігінің мәліметінше, жаңа цехтың іске қосылуы органикалық өндірісті дамытуға, ауыл шаруашылығы өнімдерін терең өңдеу әлеуетін арттыруға және агроөнеркәсіптік кешенге инновациялық технологияларды енгізуге ықпал етеді.