Дерек көзі: Қазақстан Республикасы Еңбек және халықты әлеуметтік қорғау министрлігі Қазақстанда ерекше қажеттілігі бар жандар үшін қолжетімді әрі кедергісіз орта қалыптастыру жұмыстары жалғасуда, деп хабарлайды NaizaNews.kz ҚР Еңбек және халықты әлеуметтік қорғау министрлігіне сілтеме жасап.
Елімізде 2025–2030 жылдарға арналған Инклюзивті саясат тұжырымдамасы, 2023–2027 жылдарға арналған Жол картасы және «Халықпен бірге» жобасы жүзеге асырылуда. Осы жұмыстардың маңызды бағыттарының бірі – Қолжетімділіктің интерактивті картасына енгізілген әлеуметтік инфрақұрылым нысандарын бейімдеу.
Министрліктің мәліметінше, 2026 жылдың соңына дейін республика бойынша 34 318 нысанды бейімдеу жоспарланған. 2026 жылғы 15 маусымдағы жағдай бойынша олардың 30 571-і толық бейімделген. Бұл жоспарланған көрсеткіштің 71 пайызын құрайды.
Бейімделген нысандар қатарында денсаулық сақтау және білім беру ұйымдары, мәдениет мекемелері, сауда және қызмет көрсету орындары, мемлекеттік және квазимемлекеттік ұйымдар, сондай-ақ басқа да әлеуметтік маңызы бар нысандар бар.
Ең көп бейімделген нысандар Алматы қаласында, Түркістан, Қызылорда және Атырау облыстарында, сондай-ақ Астана мен Шымкент қалаларында орналасқан.
Министрліктің мәліметінше, нысандарды бейімдеу кезінде кіреберістердің қолжетімділігіне, санитариялық бөлмелерге, навигация жүйесіне және азаматтардың қауіпсіз әрі дербес қозғалуына жағдай жасауға ерекше назар аударылады.
Ерекше қажеттілігі бар жандардың пікірінше, қолға алынған шаралар өмір сапасын жақсартып, қоғамдық өмірге белсенді араласуға мүмкіндік береді.
Қолжетімді орта қалыптастыру жұмыстары алдағы уақытта да мемлекеттік инклюзивті саясат аясында еліміздің барлық өңірінде жалғасады.