Дерек көзі: Қазақстан Республикасы Өнеркәсіп және құрылыс министрлігі Астанада Қазақстанда толық циклді алюминий кластерін құру жобасы талқыланды, деп хабарлайды Naizanews.kz ҚР Өнеркәсіп және құрылыс министрлігіне сілтеме жасап.
Өнеркәсіп және құрылыс министрі Ерсайын Нағаспаев әлемдегі электролиттік алюминий мен алюминий оксидін ірі өндірушілердің бірі саналатын East Hope Group компаниясының өкілімен кездесу өткізді.
Жоба боксит өндіруден бастап бастапқы алюминий шығаруға дейінгі толық өндірістік циклді құруды көздейді. Министрлік өкілдерінің айтуынша, терең өңдеуді дамыту және жоғары қосылған құны бар өнім өндіру елдің өнеркәсіптік саясатының негізгі міндеттерінің бірі болып табылады.
Қазіргі уақытта компания Қостанай және Ақтөбе облыстарында геологиялық барлау жұмыстарын жүргізуде. Жобаға салынатын инвестицияның жалпы көлемі 12,6 млрд АҚШ долларына бағаланып отыр.
Кездесу қорытындысы бойынша тараптар жобаны одан әрі жүзеге асыруға және инвестициялық ынтымақтастықты дамытуға қызығушылық танытатынын растады.