Энергетика министрлігі көмір генерациясын дамыту жөніндегі Ұлттық жоспар жобасын таныстырды
Дерек көзі: Қазақстан Республикасы Энергетика министрлігі
- Мемлекет басшысының тапсырмасына сәйкес, ҚР Үкіметі Энергетика министрлігі арқылы 2030 жылға дейін көмір генерациясын дамыту жөніндегі ұлттық жобаны әзірлеуде. Тұжырымдама елдегі энергия тапшылығы мәселесін ұзақ мерзімді шешуді және тозған генерациялау қуаттарын ауқымды жаңғыртуды көздейді. Жобаны іске асырудың алдын ала құны 8 трлн теңгеден асады.
-
- Энергетика министрі Ерлан Ақкенженовтың айтуынша, ұлттық жоба саланы кешенді дамытуға бағытталған және инвестициялар тартуды, отын-логистикалық инфрақұрылымды дамытуды, сондай-ақ кадрлық әлеуетті нығайтуды қамтиды. Бұл экономика үшін мультипликативтік әсер береді.
- Жоба аясында алты ірі энергия нысанын салу жоспарланған. Олардың қатарында Екібастұз ГРЭС-3, сондай-ақ Курчатов, Көкшетау, Семей, Өскемен және Жезқазған қалаларындағы станциялар бар. Сонымен қатар қолданыстағы станцияларды, оның ішінде Екібастұз ГРЭС-2 мен Ақсу ГРЭС-ін техникалық жаңғырту мәселесі қарастырылуда.
-
- Жаңа жобаларды іске асыру үшін инвесторларды тендерлік іріктеу тетіктерін қолдану, ал жұмыс істеп тұрған нысандарды жаңғырту үшін министрлікпен инвестициялық келісімдер жасау көзделіп отыр. Бұл құралдар ашықтықты қамтамасыз етуге және ұзақ мерзімді келісімшарттар шеңберінде болжамды тарифтерді сақтай отырып, инвестициялардың кепілді қайтарымын қамтамасыз етуге бағытталған.
-
- Сондай-ақ «таза көмір» технологияларын енгізуге ерекше назар аударылған. Бұл технологиялар ескірген қуаттарды жоғары тиімділігі бар және шығарындылары аз заманауи энергия блоктарымен кезең-кезеңімен алмастыруға мүмкіндік береді. Министрлік экологиялық талаптар мен елдің энергетикалық қауіпсіздігі арасындағы теңгерімді сақтаудың маңызын атап өтті.
-
- Жобаны іске асыру көмір өндіру көлемін ұлғайту және теміржол инфрақұрылымын дамыту жоспарларымен, соның ішінде «тар жерлерді» жою шараларымен үйлестірілуі тиіс. Әлеуметтік блок персоналды қорғау шараларын және «Отбасы банк» АҚ-мен бірлесіп арнайы тұрғын үй бағдарламаларын іске қосуды қамтиды. Барлық мүдделі тараптармен пысықталғаннан кейін ұсыныстар Ұлттық жобаның түпкілікті нұсқасының негізіне айналады.