Источник: Ақорда Қасым-Жомарт Тоқаев Aurubis AG бақылау кеңесінің төрағасы Фриц Варенхольтпен кездесті, деп хабарлайды NaizaNews.kz Ақорданың баспасөз қызметіне сілтеме жасап. Тараптар Қазақстанның тау-кен металлургия кешенінде бірлескен инвестициялық жобаларды іске асыру перспективаларын талқылады.
Президент отандық өнеркәсіптің басым міндеттерінің бірі шикізаттық модельден металдарды терең өңдеуге, озық технологияларды енгізуге және жоғары қосылған құны бар өнім шығаруға көшу екенін атап өтті.
Ынтымақтастықтың басым бағыттары ретінде құрамында мыс бар күрделі шикізатты кешенді өңдеу, ілеспе металдарды өндіру, қайта өңдеуді дамыту және кейінгі өңдеу өндірістерін жергіліктендіру белгіленді.
Сондай-ақ «Тау-Кен Самрук» пен Aurubis компаниясының Қазақстан аумағында мыс сынықтары мен техногендік минералдық түзілімдерді өңдеу саласындағы ынтымақтастығына ерекше назар аударылды. Тараптар осы бағыттағы перспективалы жобаларды іске асыру бойынша бірлескен іс-қимыл жоспарын әзірлеу мүмкіндігін қарастырды.