Источник: Акорда Қасым-Жомарт Тоқаев Мюнхенде Siemens AG компаниясының коммерциялық және қаржылық мәселелер жөніндегі вице-президенті Бернд Ульбрихтпен кездесті, деп хабарлайды NaizaNews.kz Ақорданың баспасөз қызметіне сілтеме жасап. Тараптар технологиялық және өнеркәсіптік ынтымақтастықты одан әрі дамыту мәселелерін талқылады.
Президент Siemens компаниясының өнеркәсіптік цифрландыру, электрлендіру, мобильділік және зияткерлік инфрақұрылым бағыттары Қазақстан экономикасын жаңғырту басымдықтарымен байланысты екенін атап өтті.
Кездесуде Siemens пен қазақстандық Silk Road Electronics компаниясының Qarmet металлургиялық комбинатындағы жабдықтарды жаңғырту жөніндегі бірлескен жобасына ерекше назар аударылды. Қазақстан ел ішінде өндірістік, инженерлік және сервистік қуаттарды дамытуға да мүдделі.
Ақорда мәліметінше, Siemens технологиялары энергетика және коммуналдық секторларды жаңғыртуда, сондай-ақ қоршаған ортаның жай-күйін бақылау сапасын арттыруда пайдалы болуы мүмкін. Сонымен қатар Siemens Healthineers компаниясымен медициналық технологиялар саласындағы ынтымақтастықты кеңейту мүмкіндігі қарастырылды.
Бернд Ульбрихт Қазақстанмен ынтымақтастықты кеңейтуге қызығушылық білдірді. Компания электр желілерін жаңғырту, цифрландыру, автоматтандыру, сумен жабдықтау және деректерді өңдеу орталығының инфрақұрылымын дамыту бағыттарында технологиялық шешімдер ұсына алады.