Источник: Aqorda Қасым-Жомарт Тоқаев ШЫҰ-ға мүше мемлекеттер басшылары кеңесінің отырысында ұйымды одан әрі дамытуға бағытталған бірқатар бастама ұсынды.
Президент Еуразия құрлығындағы стратегиялық тұрақтылық пен сенім шаралары мәселелері бойынша ШЫҰ министрлік конференциясын өткізуді ұсынды. Ол сондай-ақ қарулы қақтығыстардың салдары халықаралық нарықтарға, кеме қатынасына, энергетика мен көлік байланыстарына әсер ете бастағанын атап өтті.
Қазақстан қауіпсіздікке төнетін сын-қатерлер мен қауіптерге қарсы іс-қимыл жөніндегі Әмбебап орталықты, сондай-ақ ШЫҰ-ның Есірткіге қарсы орталығын құруды қолдады.
Тоқаев экономика мәселесіне де ерекше назар аударды. Оның айтуынша, ШЫҰ елдерінің өзара тауар айналымы бір триллион долларға жуықтап қалды. Ұсыныстар қатарында трансшекаралық сауда аймақтарын іске қосу және көлік бастамаларын одан әрі ілгерілету бар.
Президент сондай-ақ ШЫҰ Даму банкін құру идеясын қолдап, мүше мемлекеттер келісім берген жағдайда Қазақстан оның штаб-пәтерін қабылдауға дайын екенін мәлімдеді.
Тағы бір бастама - ШЫҰ аясында жетекші университеттер, ғылыми мекемелер мен технологиялық компаниялардың қатысуымен Жасанды интеллект орталықтарының желісін құру.
Сонымен қатар Тоқаев ШЫҰ-ның өзін реформалау мәселесін көтеріп, бұл жұмысты ұйымға мүше елдердің сыртқы саяси ведомстволарына тапсыруды ұсынды.
Отырыс қорытындысы бойынша мемлекет басшылары бірқатар құжатқа қол қойды.