Источник: Қазақстан Республикасы Бас прокуратурасы Бас Прокурор Берік Асыловтың төрағалығымен өткен кеңейтілген алқа отырысында 2026 жылдың бірінші жартыжылдығындағы жұмыс қорытындылары қаралды, деп хабарлайды NaizaNews.kz Қазақстан Бас прокуратурасына сілтеме жасап.
Ведомствоның мәліметінше, есепті кезеңде қылмыстық құқық бұзушылықтар деңгейі 10%-ға, оның ішінде ауыр және аса ауыр қылмыстар саны төмендеген. Алаяқтық қылмыстарының көрсеткіші де 13%-ға азайған.
Прокуратура құқық қорғау органдары мен қаржы ұйымдарымен бірлесіп интернет арқылы есірткі саудасына қарсы жұмысты күшейтті. Соның нәтижесінде 2025 жылдан бері 530 мың «дропперлік» шот бұғатталып, 2,6 млрд теңге көлеміндегі есірткіден түскен заңсыз кірістерге тосқауыл қойылды. Сонымен қатар осы бағыттағы 10 мың сайттың қызметі тоқтатылды.
Азаматтардың құқықтарын қорғау бағытында прокурорлық қадағалау актілері бойынша 2,1 млрд теңге көлеміндегі жалақы берешегі өтеліп, 168 мың жұмыскердің құқықтары қалпына келтірілді.
Сондай-ақ мыңнан астам мүмкіндігі шектеулі адамның құқықтары қорғалып, 10 мыңнан астам жасөспірімнің тегін тамақтану және жоспарлы емделу құқықтары қамтамасыз етілді. Бұдан бөлек, 2 мыңнан астам жетім бала тұрғын үймен қамтамасыз етіліп, тұрғын үй кезегіне қатысты құқықтары қалпына келтірілді.
Бас прокуратураның мәліметінше, осы саладағы заң бұзушылықтар үшін мемлекеттік органдар мен ұйымдардың 2,9 мың лауазымды тұлғасы түрлі жауапкершілікке тартылған.