Источник: Magnific Солтүстік Қазақстан облысында ағаш жаңқалы тақталар (ДСП) мен ламинатталған ағаш жаңқалы тақталар (ЛДСП) өндіретін заманауи зауыт құрылысы бойынша ірі инвестициялық жоба жүзеге асырылып жатыр, деп хабарлайды Naizanews.kz өңір әкімдігіне сілтеме жасап.
Кәсіпорын «Qyzyljar» арнайы экономикалық аймағының аумағында салынуда. Жобаның алғашқы кезеңіне салынатын инвестиция көлемі 70 млрд теңгені құрайды. Жаңа өндіріс кешені Қазақстандағы ағаш өңдеу өнеркәсібінің ең ірі нысандарының біріне айналады деп күтілуде.
Қазіргі уақытта қажетті технологиялық жабдықтардың шамамен 50%-ы сатып алынған. Жабдықтар Қытайдағы өндірістік алаңдарда орналасқан және жоба жүзеге асуына қарай өңірге жеткізілетін болады.
Инвестор құрылыс-монтаж жұмыстарына осы айдың соңына дейін кірісуге дайын екенін растады. Зауыт іске қосылғаннан кейін 180 адам тұрақты жұмыспен қамтылады.
Кәсіпорынның өндірістік қуаты жылына 600 мың текше метр ДСП және 20 миллион шаршы метр ЛДСП шығаруға мүмкіндік береді. Өнім жиһаз өндірісі мен құрылыс саласында кеңінен қолданылатын болады.
Өңірде жаңа зауыттың іске қосылуы өңдеуші өнеркәсіп өнімдерінің көлемін арттырып, қосымша инвестициялар тартуға және Солтүстік Қазақстан облысының өнеркәсіптік әлеуетін нығайтуға ықпал етеді деп күтілуде.