Дерек көзі: Magnific Қазақстанның энергетикалық нысандарында 2026–2027 жылғы жылыту маусымына дайындық аясында ауқымды жөндеу науқаны жалғасуда, деп хабарлайды Naizanews.kz ҚР Энергетика министрлігіне сілтеме жасап.
Бұл мәселе энергетика кешені мен ел инфрақұрылымын алдағы күзгі-қысқы кезеңге дайындау жөніндегі республикалық штабтың кезекті отырысында қаралды. Ведомствоның мәліметінше, негізгі міндет – халықты жылу және электр энергиясымен тұрақты қамтамасыз ету.
Энергетика министрлігінің ақпараты бойынша, бүгінгі күні электр станцияларында негізгі жабдықтардың 16 бірлігіне күрделі жөндеу аяқталған. Оның ішінде 2 энергоблок, 10 қазандық және 4 турбина жөнделді.
Сонымен қатар қазір 2 энергоблокта, 26 қазандықта және 16 турбинада жөндеу жұмыстары жалғасып жатыр. Электр желілері инфрақұрылымын жаңғырту да қатар жүргізілуде. Бүгінде шамамен 4,8 мың шақырым электр беру желісі, 107 қосалқы станция және 1065 тарату пункті жөнделген.
Жылу желілерінде де жұмыстар жалғасуда. Жоспарланған 377 шақырым қайта жаңғырту және күрделі жөндеу жұмыстарының 213 шақырымында жұмыс жүргізілуде, ал 52 шақырымында жұмыстар толық аяқталған.
Отырыс барысында отын қорын жинақтау, Бірыңғай электр энергетикалық жүйенің тұрақты жұмысын қамтамасыз ету, өңірлерді газбен жабдықтау және көмір тасымалын ұйымдастыру мәселелері де қаралды. Жөндеу жұмыстарының мерзіміне қатысты тәуекелдер сақталған нысандарға ерекше назар аударылды.
Кеңес қорытындысы бойынша энергетикалық кәсіпорындарға жөндеу бағдарламаларын толық көлемде орындау тапсырылды. Ал әкімдіктерге жылыту маусымы басталғанға дейін жылумен жабдықтау және электр желілері нысандарындағы жұмыстарды уақытылы аяқтау жүктелді.