Источник: Қазақстан Республикасы Көлік министрлігі Қазақстанда шекарадағы күту аймақтарына жаңа талаптар әзірленуде, деп хабарлайды NAIZA NEWS ҚР Көлік министрлігіне сілтеме жасап. Құжат мұндай алаңдардың инфрақұрылымы, қозғалысты ұйымдастыру және техникалық жабдықталу деңгейін реттейді.
Жобалау кезінде өткізу бекеттерінің өткізу қабілеті, көлік ағыны, жер бедері мен климаттық жағдайлар ескеріледі. Қозғалыс сызбасы кіру, сәйкестендіру, күту және шығу кезеңдерін қауіпсіз бөлуге тиіс.
Күту аймақтары үш функционалдық блоктан тұрады: тұрақ, коммерциялық және әкімшілік. Тұрақтар кемінде 200 жүк көлігіне есептеледі, жеңіл көліктер үшін бөлек орын қарастырылып, терминалдар мен мобильді қосымшалар арқылы электронды кезек енгізіледі.
Коммерциялық бөлікте жүргізушілерге арналған сервистік нысандар болады, ал әкімшілік аймақ операторлар мен қажет болған жағдайда мемлекеттік органдарға арналған. Сондай-ақ кіріп-шығуды бақылау, нөмірді тану және мемлекеттік дерекқорлармен интеграция жүйелері енгізіледі.
Қауіпсіздік, байланыс және интернетке қолжетімділікке ерекше көңіл бөлінген. Жаңа талаптар шекарадағы өткізу қабілеті мен қызмет көрсету сапасын арттырады деп күтілуде.
Жоба «Ашық НҚА» порталында жарияланған.