Источник: Aqorda Барлық деңгейдегі мәслихат депутаттарының III республикалық форумында Қасым-Жомарт Тоқаев жергілікті өкілді органдар өңірлерді дамытуда және халықтың күнделікті мәселелерін шешуде анағұрлым белсенді рөл атқаруы тиіс екенін айтты. Оның сөзінше, мәслихат депутаттары халықпен тікелей байланыста болып, азаматтардың нақты қажеттіліктерін бәрінен жақсы біледі.
Президент мәслихаттардың рөлін күшейту бағыты өз нәтижесін бергенін атап өтті: олардың беделі артты, сонымен бірге өңірлердің қаржылық мүмкіндіктері де кеңейді. Өткен жылы ауылдық округтердің бюджеті 442 млрд теңгеден асты, оның үштен бірі өз кірістерінен қалыптасты. Биылдан бастап жергілікті деңгейге жаңа кіріс көздері де беріліп жатыр.
«Бұл — дұрыс қағида: табыс сол табыс табылған аумақтың дамуына қызмет етуі керек. Қысқасы, өңірлердің қолындағы ресурстар көбейіп келеді, ал мәслихаттардың міндеті — олардың тиімді пайдаланылуын қамтамасыз ету».
Тоқаев жергілікті бюджеттерді формалды әрі асығыс қарау тәжірибесін де сынға алды. Оның айтуынша, кей жағдайда қаржы тиімсіз жобаларға жұмсалып жатады. Сондықтан депутаттар бюджет процесіне бастапқы кезеңнен бастап қатысып, әрбір теңгенің халықтың нақты қажеттілігіне жұмсалуын талап етуі тиіс.
«Әкімдер республикалық бюджеттен бөлінетін дотацияға үміт арта бермеуі керек. Масылдық көзқарастан біржола арылу қажет. Жергілікті билік өкілдері кірістерді арттыру бағытында белсенді жұмыс істеуі тиіс. Бюджет шешімдері негізгі сұрақтарға жауап беруі керек: қанша жұмыс орны ашылады, қанша жеке инвестиция тартылады, бизнесті дамытуға қандай жағдай жасалады, қанша салық төленеді?»
Президент сондай-ақ депутаттардың жауапкершілігін күшейту, мәслихаттардың ішкі жұмысын қайта қарау және олардың төрағалары үшін ротация қағидатын енгізу қажеттігін айтты. Оның бағалауынша, мәслихаттар формалды құрылым емес, аумақтардың дамуына, халықтың өмір сапасына және билікке деген сенімге ықпал ететін толыққанды институтқа айналуы тиіс.