Білім беруді цифрлық трансформациялаудың стратегиялық бағыттары Астанада талқыланды
Источник: Қазақстан Республикасының Оқу-ағарту министрлігі
- Қазақстанның Оқу-ағарту министрі Жұлдыз Сүлейменова «Sinovation Ventures» жасанды интеллект институтының президенті, доктор Ли Кай-Фумен кездесу өткізді. Тараптар жасанды интеллектіні орта және техникалық білім беру жүйесіне енгізу, сондай-ақ адами капиталдың сапасын арттыру мәселелерін талқылады.
-
- Министрлікте Мемлекет басшысының бастамасымен биылғы жыл Цифрландыру және жасанды интеллект жылы болып жарияланғаны еске салынды. Жұлдыз Сүлейменова жасанды интеллект тек технологиялық құрал ғана емес, білім беруді, әлеуметтік саясатты және мемлекеттік басқаруды жаңғыртудың стратегиялық ресурсы ретінде қарастырылатынын атап өтті.
-
- Министрдің айтуынша, жүйелі жұмыстың нәтижесінде 100 мың мұғалім ChatGPT және өзге де жасанды интеллект құралдарын қолдану бойынша арнайы дайындықтан өтіп, тиісті сертификаттар алған. Стратегиялық мақсат ретінде ЖИ-ді инклюзивті білім беруде, оқытуды жекелендіруде және педагогтерге түсетін әкімшілік жүктемені азайтуда пайдалану белгіленді.
-
- Доктор Ли Кай-Фу жасанды интеллект мұғалімдерді мәтін тексеру, тестілеу және есеп беру сияқты техникалық рутиналық жұмыстардан босатып, олардың тәлімгер әрі шығармашылық дамудың көшбасшысы ретіндегі рөлін күшейте алатынын айтты. Ол әрбір оқушының қызығушылығы мен когнитивтік ерекшеліктеріне сай білім беру контентін бейімдеуді, соның ішінде пәнаралық интеграцияны басым бағыт ретінде атап өтті.
-
- Сондай-ақ анимациялық технологиялар мен интеллектуалды цифрлық агенттерді пайдалана отырып интерактивті білім беру ортасын дамыту және жасанды интеллекттің еңбек нарығына әсері талқыланды. Сарапшының бағалауынша, бұл технологиялар жұмыс үдерістерінің 60%-ына дейін оңтайландырып, жұмыспен қамту құрылымын креативті және коммуникациялық дағдыларға қарай ығыстырады.
-
- Оқу-ағарту министрі цифрлық реформалар педагогтер мен ата-аналардың пікірін ескере отырып жүзеге асырылатынын, түсіндіру жұмыстары мен қайта даярлау бағдарламалары күшейтілетінін атап өтті. Кездесу қорытындысы бойынша тараптар білім беруде жасанды интеллектіні қолданудың бірлескен стратегиясын әзірлеуге, оның ішінде технологиялық лицензияларды қолдауға, жергілікті инновациялық компания құруға және «AI Kitap» пилоттық жобалары мен елордалық №107 мектеп базасындағы бастамаларды кеңейтуге уағдаласты.