Источник: ҚР Үкіметі Қазақстанда жылыту маусымы жоспарға сәйкес басталды, деп хабарлайды NaizaNews.kz ҚР Үкіметіне сілтеме жасап. Қазіргі уақытта 11 өңірде жылу беру іске қосылды, ал оңтүстік және батыс аймақтарда жылу кестеге және ауа райына байланысты беріледі.
Премьер-министр Олжас Бектенов бұған дейін жылу көздері мен желілерді 1 қазанға дейін толық дайындауды тапсырғанын еске салды. Оның айтуынша, бір өңірден басқа барлық аймақ белгіленген мерзімге үлгерген.
Абай облысы бұл талапты уақытында орындай алмаған. Семей қаласының жылу желілерін уақтылы дайындамау және тиісті үйлестірудің болмауына байланысты Премьер-министр осы бағытқа жауапты облыс әкімінің орынбасарын тәртіптік жауапкершілікке тартуды тапсырды.
Үкімет басшысы жылыту маусымының өтуіне бақылауды күшейту қажеттігін де атап өтті. Өңір әкімдеріне аймақтық штабтардың жұмысын қайта жандандырып, энергия көздері мен желілердің жағдайын тұрақты тексеру тапсырылды.
Сонымен қатар жоспарлы көрсеткіштерді сақтау, нормативтік отын қорын қамтамасыз ету және резервтік жабдықтардың дайындығын бақылау қажет. Халыққа көмірдің тұрақты бағамен қолжетімді болуы да тұрақты бақылауда болуы тиіс.
Премьер-министрдің бірінші орынбасары Нұрлыбек Нәлібаев барлық жылу көздерінде қажетті отын қоры жасақталғанын, ал жылу және электр желілеріндегі жөндеу жұмыстары аяқталуға жақын екенін баяндады.
Алматы мен Шымкент қалаларында, Ұлытау және Жетісу облыстарында, сондай-ақ Алматы, Түркістан, Жамбыл, Батыс Қазақстан, Қызылорда және Маңғыстау облыстарында жылу қазан айының соңына дейін кесте мен ауа райына сәйкес қосылады.