Источник: Ақорда Ақордада Президент Қасым-Жомарт Тоқаевтың төрағалығымен Жасанды интеллектіні дамыту жөніндегі кеңестің үшінші отырысы өтті, деп хабарлайды NaizaNews.kz Ақордаға сілтеме жасап. Жиынның негізгі тақырыбы өнеркәсіп секторын терең цифрлық трансформациялау болды.
Мемлекет басшысы жасанды интеллект жаңа цифрлық дәуірде бәсекеге қабілеттіліктің негізгі факторларының біріне айналып келе жатқанын атап өтті. Оның айтуынша, Қазақстан жаңа технологиялардың мүмкіндігін еңбек өнімділігін арттыруға, технологиялық жаңғыртуды жеделдетуге және қосылған құны жоғары өнім өндірісін ұлғайтуға пайдалануы қажет.
Президент бұл саладағы жаһандық өзгерістерге де тоқталды. БҰҰ-ның 2026 жылғы өнеркәсіптік даму жөніндегі есебіне сәйкес, жасанды интеллект әлемдік экономиканы өзгертетін бес трансформациялық мегатрендтің қатарына енген. Соңғы бес жылда жасанды интеллектімен байланысты патенттердің жалпы өтінімдердегі үлесі шамамен үш есе өскен.
Қасым-Жомарт Тоқаев Digital Qazaqstan стратегиясы аясында 2029 жылға дейін елде нақты экономикалық нәтиже беруге бағытталған жасанды интеллектінің кешенді ұлттық экожүйесі қалыптастырылып жатқанын айтты.
Биылғы сегіз айда өнеркәсіп өндірісінің көлемі шамамен 46 трлн теңгені құрады. Ал өңдеу өнеркәсібі өткен жылдың сәйкес кезеңімен салыстырғанда 8,4%-ға өскен. Президент экономикалық өсімнің жоғары қарқынын сақтау үшін еңбек өнімділігін арттырып, өнеркәсіптік базаны жаңғырту қажет екенін атап өтті.
Мемлекет басшысының айтуынша, жасанды интеллектінің басты құндылығы адамның мүмкіндіктерін кеңейтуде. Мұндай технологиялар инженерлерге нақты шешім қабылдауға, еңбек өнімділігін арттыруға және басшыларға жедел талдамалық ақпарат алуға көмектеседі.
Жиын қорытындысы бойынша Қасым-Жомарт Тоқаев Үкіметке ұлттық компаниялармен және жеке бизнеспен бірлесіп, өнеркәсіптегі өзекті AI-міндеттерді анықтау және оларды тұрақты жаңартып отыру тетігін әзірлеуді тапсырды.
Сонымен қатар Президент ғылымның қолданбалы бағытын күшейтуге шақырды. Ол Кеңестің алдыңғы отырысында жасанды интеллект саласындағы мамандандырылған зерттеу университетін құру туралы шешім қабылданғанын еске салды.