Дерек көзі: Ақорда Қасым-Жомарт Тоқаев Linde GmbH компаниясының аға вице-президенті Оливер Пфаннмен кездесті, деп хабарлайды NaizaNews.kz Ақорданың баспасөз қызметіне сілтеме жасап. Мемлекет басшысы компанияның Қазақстан өнеркәсібін дамытуға қосқан үлесін жоғары бағалады.
Президент Linde компаниясының Қазақстанда инвестиция көлемі 500 миллион долларға дейінгі жаңа жобаларды іске асыру жоспарын құптады. Соның ішінде Linde мен Qarmet арасында Теміртауда жаңа ауа бөлу қондырғысын салу жөніндегі келісім бар.
Кездесу барысында мұнай-химия өнеркәсібіндегі бірлескен жобалардың перспективалары да қарастырылды. Linde компаниясының көміртекті ұстау және сақтау технологияларына, сондай-ақ сутегі инфрақұрылымын дамыту жоспарына ерекше назар аударылды.
Қасым-Жомарт Тоқаев Атырау және Маңғыстау облыстарындағы мұнай-химия және химия кластерлерінің дамуы туралы айтып, Linde компаниясын осы салалардағы перспективалы жобаларға қатысуға шақырды.
Оливер Пфанн компания бастамаларына қолдау көрсеткені үшін Президентке алғыс айтып, Қазақстанмен серіктестікті одан әрі кеңейтуге және жаңа өндірістер ашуға дайын екенін білдірді.