Источник: ҚР Су ресурстары және ирригация министрлігі Қазақстан мен Германия технология алмасуға, цифрлық шешімдерді енгізуге және пилоттық жобаларды жүзеге асыруға арналған бірлескен су хабын құру мәселесін пысықтап жатыр, деп хабарлайды NaizaNews.kz Қазақстан Республикасының Су ресурстары және ирригация министрлігіне сілтеме жасап.
Жобаның келешегін Су ресурстары және ирригация министрі Нұржан Нұржігітов пен Германияның Қазақстандағы Төтенше және Өкілетті Елшісі Хайке Ренате Пайч талқылады.
Қазақстан-Германия су хабын құру туралы ұсыныс бұған дейін Берлинде екі елдің су саласындағы стратегиялық әріптестігіне арналған дөңгелек үстелде таныстырылған.
Хаб тұжырымдамасының жобасын Су ресурстарының ақпараттық-талдау орталығы әзірледі. Құжат су саласындағы 300-ден астам компанияны біріктіретін German Water Partnership қауымдастығына келісуге жіберілді.
2025 жылғы қазанда Қазақстанның Су ресурстары және ирригация министрлігі мен German Water Partnership су ресурстарын басқару саласындағы стратегиялық әріптестік туралы келісімге қол қойған.
Министрлік мәліметінше, жаңа хаб Қазақстан мен Германияның мемлекеттік органдары, бизнес, ғылыми және сараптамалық қауымдастықтары үшін өзара іс-қимыл алаңы ретінде қарастырылып отыр. Онда заманауи технологияларды сынақтан өткізу және бірлескен жобаларды жүзеге асыру жоспарланған.
Кездесу барысында тараптар мамандарды бірлесіп даярлау және су ресурстарын басқару саласындағы озық тәжірибелермен алмасуды да талқылады. Сонымен қатар Қазақстанның су шаруашылығы инфрақұрылымын жаңғыртуға неміс технологияларын, инженерлік шешімдер мен сараптамалық тәжірибені тарту мүмкіндігі қарастырылды.