Источник: Aqorda Қасым-Жомарт Тоқаев педагогтердің әкімшілік жүктемесін азайту қажеттігін айтты, деп хабарлайды NaizaNews.kz Ақордаға сілтеме жасап.
Мемлекет басшысының айтуынша, білім беру базасын жаңғырту мемлекеттік сервистер мен қызметтерді біріктіріп, мұғалімдердің уақыт алатын күнделікті жұмысын азайтуға мүмкіндік береді.
«Білім беру базасын жаңғырту қолға алынды. Яғни бүкіл мемлекеттік сервис пен қызмет біріктіріледі. Мұғалімдер уақыт алатын шаруадан арылады.
Әсіресе, соңғысы өте маңызды. Педагогтерді ығыр қылатын қағазбастылықтан, бітпейтін есептен, аттестациядан өту талабынан және басқа да пайдасыз тексерістерден босату керек.
Мұғалімдерді жөндеу жұмыстарына, оқу процесіне тікелей қатысы жоқ түрлі қоғамдық іс-шараларға тартқаны туралы жаңалықтар ара-тұра шығып жатады. Бұл жөнінде әлдеқашан келіскенбіз. Бұған жол беруге болмайды.
Оқу-ағарту министрлігі мен әкімдіктер басқармалары, ең алдымен, құқықтық-нормативтік актілер мен саланы реттеу базасын жетілдірумен, оқу үдерісін тиімді ұйымдастырумен және білім беру бағдарламаларын мұқият саралаумен айналысуы қажет».
Президент педагогтерді оқу процесіне тікелей қатысы жоқ жөндеу жұмыстары мен қоғамдық іс-шараларға тартуға болмайтынын атап өтті.
Мемлекет басшысының айтуынша, Оқу-ағарту министрлігі мен әкімдіктер басқармалары құқықтық-нормативтік және реттеу базасын жетілдіруге, оқу үдерісін тиімді ұйымдастыруға және білім беру бағдарламаларын мұқият саралауға басымдық беруі қажет.