Источник: Қазақстан Республикасы Көлік министрлігі Еліміздің бірқатар өңірінде жүргізілген ауқымды реконструкциядан кейін 30 теміржол вокзалы мен жолаушылар инфрақұрылымы нысаны пайдалануға берілді, деп хабарлайды NaizaNews.kz ҚР Көлік министрлігіне сілтеме жасап.
Жобалар Мемлекет басшысының көлік инфрақұрылымын дамыту және жолаушылар тасымалының сапасын арттыру жөніндегі тапсырмалары аясында жүзеге асырылды. Министрліктің мәліметінше, бұл соңғы жылдардағы теміржол вокзалдарын жаңғыртуға бағытталған ең ауқымды жоба болды.
Жаңғырту нәтижесінде вокзалдар жолаушылар үшін анағұрлым жайлы әрі қауіпсіз бола түсті, олардың өткізу қабілеті артты. Сонымен қатар теміржол саласы қызметкерлерінің еңбек жағдайы жақсартылды.
Жұмыстар барысында ғимараттардың қасбеттері мен шатырлары жаңартылып, энергия үнемдейтін витраждар орнатылды. Сондай-ақ жылу, сумен жабдықтау, желдету, ауа баптау, өрт қауіпсіздігі және бейнебақылау жүйелері жаңғыртылды. Құрылыс және реконструкция кезінде негізінен отандық өндірістің материалдары пайдаланылды.
Жоба аясында кедергісіз орта қалыптастыруға ерекше көңіл бөлінді. Вокзалдарда пандустар, лифтілер, бейімделген кіреберіс аймақтары, санитарлық бөлмелер, тактильді жолақтар және арнайы кассалар орнатылды. Нысандардың санатына қарай ана мен бала бөлмелері, медициналық пункттер, сақтау камералары жабдықталып, жолаушылар қозғалысын тиімді ұйымдастыру үшін ішкі жоспарлау қайта қаралды.
Жаңғырту вокзал ғимараттарымен ғана шектелмей, жолаушылар платформаларын, вокзал маңындағы аумақтарды және инженерлік инфрақұрылымды да қамтыды. Барлық нысандар заманауи қауіпсіздік талаптарына, санитарлық нормаларға және қызмет көрсету стандарттарына сәйкестендірілді.
Министрліктің мәліметінше, еліміздегі теміржол вокзалдарының басым бөлігі 1950–1970 жылдары салынған. Кейбір ғимараттар 80–100 жылдан бері пайдаланылып келеді, ал нысандардың шамамен 70%-ы ондаған жыл бойы күрделі жөндеуден өтпеген.
Жаңғыртудан кейін вокзалдар Абай, Ақмола, Атырау, Батыс Қазақстан, Қарағанды, Қостанай, Қызылорда, Алматы, Шығыс Қазақстан, Солтүстік Қазақстан, Павлодар облыстарында және Жетісу облысында пайдалануға берілді.
Министрлік жолаушылар инфрақұрылымын жаңғырту жұмыстары алдағы уақытта да жалғасатынын мәлімдеді. Бұл жұмыстар азаматтар үшін қауіпсіз әрі жайлы жағдай жасап, еліміздің көлік байланысын одан әрі дамытуға бағытталған.