Источник: Қазақстан Республикасы Ауыл шаруашылығы министрлігі Қазақстандық және қытайлық ғалымдар марокко шегірткесіне қарсы әзірленген жаңа биологиялық препараттың далалық сынақтарын аяқтады, деп хабарлайды NaizaNews.kz ҚР Ауыл шаруашылығы министрлігіне сілтеме жасап.
Зерттеу жұмыстары «Шекаралас көбею ошақтарындағы шегірткелерге қарсы саңырауқұлақ негізіндегі биопрепараттарды қолдану технологиясын зерттеу және демонстрациялау» халықаралық жобасы аясында жүзеге асырылды. Оған Ж. Жиембаев атындағы Қазақ өсімдік қорғау және карантин ғылыми-зерттеу институтының мамандары мен Қытай ауыл шаруашылығы ғылымдары академиясының Өсімдік қорғау институтының ғалымдары қатысты.
Далалық сынақтар Түркістан облысының Қазығұрт ауданындағы жайылымдық алқаптарда жүргізілді. Зерттеу барысында энтомопатогенді Metarhizium anisopliae саңырауқұлағы негізінде жасалған биологиялық препарат пайдаланылды. Мамандардың айтуынша, бұл өнім химиялық инсектицидтерге экологиялық қауіпсіз балама бола алады.
Препараттың тиімділігін анықтау үшін өңделген жәндіктер арнайы далалық торларға орналастырылып, бақылау топтарымен салыстырылды. Зерттеу кезеңінде мамандар шегірткелердің жағдайын күн сайын бақылап, олардың тіршілік ету көрсеткіштерін тіркеп отырған.
Алғашқы әсері өңдеуден кейін үшінші күні байқалған. Бесінші тәулікте зиянкестердің қырылу деңгейі 70–80 пайызға жетсе, тоғызыншы күні тәжірибелік топтардағы шегірткелердің толық жойылғаны анықталған.
Министрліктің мәліметінше, марокко шегірткесі ауыл шаруашылығы алқаптары мен жайылымдарға айтарлықтай зиян келтіретін аса қауіпті зиянкестердің бірі саналады. Осыған байланысты олармен күрестің экологиялық қауіпсіз тәсілдерін дамыту агроөнеркәсіп кешеніндегі маңызды бағыттардың бірі болып отыр.
Ғалымдардың пікірінше, жүргізілген сынақтар энтомопатогенді саңырауқұлақтарға негізделген биопрепараттардың жоғары тиімділігін көрсетіп, шегіртке зиянкестерінің санын қоршаған ортаға қосымша химиялық әсерсіз реттеуге мүмкіндік беретінін дәлелдеді.
Алдағы уақытта зерттеушілер биопрепаратты Қазақстанның әртүрлі климаттық аймақтарында сынақтан өткізуді жоспарлап отыр. Сонымен қатар бұл технологияны шегіртке зиянкестерін мониторингтеу және олардың санын басқару жүйесіне енгізу бойынша практикалық ұсынымдар әзірлеу көзделуде.