Источник: Magnific.com Қазақстанда сұранысқа ие 50-ден астам мамандық бойынша шетелдік мамандарды жұмысқа қабылдаудың жеңілдетілген тәртібі қолданылады, деп хабарлайды Naizanews.kz.
Тізімге IT, денсаулық сақтау, инженерия және креативті индустрия салаларындағы мамандар енгізілген. Бұл тізімдегі мамандық иелеріне елде тұрақты тұруға рұқсат алу мүмкіндігі беріледі.
Еңбек министрлігінің мәліметінше, 2026 жылдың басынан бері Қазақстанда медицина саласындағы кадр тапшылығы сақталып отыр. Ең көп сұранысқа ие мамандар қатарында акушер-гинекологтар, педиатрлар және анестезиолог-реаниматологтар бар.
Сонымен қатар қолданбалы бағдарламашылар мен графикалық дизайнерлерге де жоғары сұраныс байқалады.
Еңбек шарттарын есепке алудың бірыңғай жүйесінің дерегіне сәйкес, сұранысқа ие мамандықтар бойынша 45 мыңнан астам еңбек шарты жасалған. Ең көп үлес бағдарламалық қамтамасыз ету әзірлеушілері мен медицина қызметкерлеріне тиесілі.
Ведомство өкілдері еңбек нарығы көптеген мамандықтар бойынша қажеттілікті өтеп отырғанын, алайда денсаулық сақтау саласындағы кадр тапшылығы әлі де өзекті болып қала беретінін атап өтті.